Җиләктән утынга кадәр

Ярминкәдә барлык унөч авыл җирлегеннән, шулай ук аларның территориясендә урнашкан шәхси ярдәмче һәм крестьян-фермер хуҗалыкларыннан товарлар тәкъдим ителде. Көзге бүләкләр – яшелчә, сөт продукциясе, ит, бал, йомырка, кышка әзерләнгән ризыклар, хуш исле бәлеш һәм хәтта яңа җиләк тә! Моннан тыш, биредә утын, он, май, шикәр, икмәк сатып алырга мөмкин иде.

Сатучыларның бизәлешкә иҗат һәм фантазия белән килүләре аеруча күңелле булды – өстәлләр җылылык һәм күңел белән бизәлгән иде.

“Ярминкә бик шәп. Мин рәхәтләнеп яшелчәләр сатып алдым. Нинди ныклы кәбестә! Һәм бәяләр, әйтергә кирәк, “тешләми”, – дип үз тәэсирләре белән уртаклашты пенсионер Алевтина Лесюк.

Тамак ялгап җылынырга теләүчеләр өчен хуш исле пылау, шашлык һәм кайнар чәй белән сәүдә рәтләре эшләде. Мәдәният сарае хезмәткәрләре һәм үзешчән сәнгать артистлары бәйрәм рухы тудырып, кунакларны җырлары белән сөендерде.

Әмма ярминкәдә иң мөһиме – авыл халкының аралашуы һәм бердәмлеге.