Волонтерлар хәрәкәтенә һәркем кушыла ала

Саннар үзләре үк сөйли: өч авыл волонтерлары уртак тырышлык белән 1500дән артык маскировка челтәре ясаган инде. Күләм буенча Тарказының “Бал кортлары” төркеме лидер булды – алар исәбендә нәкъ 1000 челтәр. Күршеләр дә калышмый: Яңа Турай һәм Яңа Шах волонтерлары 296 һәм 205 челтәр үреп җибәргән. Бер стандарт маскировка челтәренең 18 квадрат метр чамасы җирне каплавын исәпкә алсак, авыл халкының безнең яклаучыларның иминлегенә керткән гомуми өлешен исәпләп чыгару кыен түгел. Бу техниканы һәм блиндажларны дошман күзләреннән яшерә торган 27 мең квадрат метрдан артык “күренми торган калкан”. Шунысы игътибарга лаек, бу төркемнәрнең һәрберсендә зур булмаган командалар эшли – алтыдан тугыз кешегә кадәр. Составы аз булуга карамастан, эш бер көнгә дә тукталмый. Бу тырышлык һәм сабырлык таләп итә торган хезмәт, аны волонтерлар үз бурычы дип атый. Эш тагын да тизрәк барсын өчен, тәҗрибәле осталар аңа үсеп килүче буынны җәлеп итәргә булды. Шушы көннәрдә Тарказы волонтерлары – Галия Гайнанова, Флүрә Насрыева һәм Лилия Шәймәрданова – Бәләбәй механизацияләү һәм электрлаштыру көллиятенең Ярмәкәй авылындагы филиалында челтәр үрү буенча мастер-класс үткәрде. Хатын-кызлар студентларның энергиясе һәм энтузиазмы бик яхшы ярдәм булачагына ышана. “Без волонтерлар сафы яшьләр белән тулыланыр дип өметләнәбез, һәм бергәләп без егетләребезнең ихтыяҗларын тагын да күбрәк каплый алырбыз”, – дип билгелиләр осталар. Челтәрләр үрүдән тыш, Тарказы волонтер-тегүчеләре (алты кешедән торган команда) тагын бер мөһим юнәлешне үзләштерде. Шушы көннәрдә алар шатлыклы яңалык белән уртаклашты: оста куллылар 750 антидрон одеял ясаган. Сугышчыларны тепловизор-лардан саклый торган бу эшләнмәләр алтынга тиң. Безнең волонтерлар ясаган һәр эшләнмә – сугышчыларыбызның тизрәк исән-сау өйгә кайтуына өмет һәм хәстәрлек ул. Волонтерлык хәрәкәтенә һәркем кушыла ала. Тыл ярдәме – безнең уртак җиңүебезнең ышанычлы нигезе.